PALUBA

С О О П Ш Т Е Н И Е
10:38 - сре., 25.11.2009

Утре, 26 ноември (четврток) на воениот дел од аеродромот ,,Александар Велики“ со почеток во 13.30 часот ќе започнат вежбовни активности на АРМ за презентација на воздухопловниот ВИНГ (вВИНГ) на АРМ и Армискиот полигон (АП) ,,Криволак“. Првиот дел од активностите ќе се изведува на воениот дел од аеродромот ,,Александар Велики“, со изведување на демонстративен лет на вВИНГ, каде во една формација заедно ќе летаат транспортниот и борбениот сквадрон на вВИНГ како единица за блиска воздушна поддршка на единиците на АРМ, а која се наоѓа во формацискиот состав на Здружената оперативна команда на АРМ.

Во вториот дел од активностите ќе биде презентирана првата фаза од развојниот проект за АП ,,Криволак“ како регионален центар за обука. За таа цел, на делот од полигонот наречен ,,Стрела-1“, Министерот за одбрана г-дин Зоран Коњановски свечено ќе ги пушти во употреба новите капацитети за сместување и обука, со кои се заокружува завршувањето на работните зафати предвидени за првата фаза на АП ,,Криволак“ како регионален центар кој ќе одговори на барањата за современа обука согласно стандардите на НАТО. Командата за обука во чиј состав се наоѓа полигонот, ќе одржи брифинг за развојот на полигонот, како и за идните чекори за реализација на целокупниот проект. Во рамките на вежбовните активности, утре на АП ,,Криволак“ припадниците на полкот за специјални операции ќе изведат програмско гаѓање во новоизградената ,,Куќа за гаѓање“ (Shooting House), после што ќе следи бојно гаѓање и ракетирање со борбен хеликоптер Ми-24 во самрак и во ноќни услови. Исто така, присутните ќе имаат можност да се запознаат со новоизградените полигони за обука наменети за борба во урбана средина, планинското село, дел од новите сместувачки капацитети и инфраструктурата на полигонот и друго.

На првиот дел од презентацијата на воениот дел од аеродромот ,,Александар Велики“ се очекува да присуствува Претседателот на Република Македонија и Врховен командант на Вооружените сили д-р Ѓорге Иванов, додека на комплетната презентација ќе присуствуваат: Министерот за одбрана г-дин Зоран Коњановски, Началникот на ГШ на АРМ генерал-потполковник Мирослав Стојановски, претставници на МО и ГШ на АРМ, командантите на потчинетите команди и единици, а поканети се и пратеници во Собранието на Република Македонија, амбасадорите и воените аташеа акредитирани во Република Македонија.

Се покануваат новинари, сниматели и фоторепортери, да присуствуваат и да известуваат за настанот. Заради запазување на процедурите за влез во воениот дел од аеродромот ,,Александар Велики“, потребно е пред влезот во касарната ,,Страшо Пинџур“ во Петровец да бидете најдоцна до 13.00 часот. За превоз на претставниците на медиумите од аеродромот ,,Александар Велики“ до АП ,,Криволак“ и обратно, ГШ на АРМ обезбеди организиран превоз.